Det skulle bli spennande å sjå kor me det nyoppstarta handballaget låg om lag 3 veker før seriestart. Det ein skal ha i mente før ein les dette referatet er at mange av spelarane på Fjøra HK ikkje har spelt aktivt på mange år og nokon har ikkje spelt handball i det heile. Laget har berre trena i to veker og alle fekk si tilmålte tid på bana, uavhengig korleis det låg an på bana resultatmessig. For dei som måtte lure på det; treningskamp er akkurat det som ligg i ordet, ei trening for å setje formasjonar, la spelarane få prøva seg, og få ei gjennomkøyring. Det er berre i fotballnorge ein for ein kvar pris skal vinne kvar kamp, og ikkje sjå det som ei trening fram mot seriestart.

Ikkje veit me kva det var, men starten på kampen vart ikkje den beste for Fjøra HK. Skuldast det at dei måtte spela i ukjente blå fargar (reservedraktene til herrelaget, som heller ikkje har teke mange poeng med denne draktfargen :-), at draktene var langarma (har aldri sett damelag med langarma drakter... hehehe). Men det var klart at i starten av kampen så sat ikkje formasjonane heilt slik som dei skulle. Det vart for mykje rush imot, angrepsspelet kladda, me kom for langt inn i forsvarsmuren til Sogndal, i tillegg til at Sogndalkeeper Hedda Hough, stod som ei gudinne i mål.

Dette resulterte i at det etter omlag 20 minuttar stod 12 - 1 til Sogndal. Heilt greitt etter spel og sjansar, viss ein kan skriva da i eit handballreferat (som er heilt nytt for oss å skriva :-). Men i dei siste 10 minuttane gjekk da ein liten f… i jentene. Det var som at dei sa til seg sjølve, me ekje so dårlege so resultatet tilseier, og så klinka dei til og spelte jamnt med motstandarane resten av omgangen. Det kan og nemnast at Fjøra HK skifta mykje meir på laget enn det Sogndal gjorde, noko som heilt klart kan ha noke å seie for strukturen og dermed resultatet i ein handballkamp (utan at me skal påberopa oss noko ekspertstatus i så måte).

Resultat til pause var 16- 5 til Sogndal

I 2. omgang starta Fjøra klart best, og 10 minuttar ut i omgangen var stillinga 17-10 til Sogndal, og underteikna hadde eit fåfengt håp om at Fjøra skulle snu kampen til siger. Det hadde i så fall vore ein prestasjon utan sidesykkje. Men diverre heldt det ikkje inn. Etterkvart so kom det tilsyne at Sogndal har eit heilt anna treningsgrunnlag enn Fjøra. Jentene var sletne som ein sprengde ver (hm, jeddna ikkje det beste bildet når me snakkar om ein handballkamp for jenter :-). I tillegg la dei om til 5-1 i forsvar, og då fekk jentene våre store problem. Fjøra kom for langt inn mot forsvaret deira, og ballen vart snappa gong på gong. Trur minst 6-7 av dei siste 13 måla var rushangep rett i goalen. Og framfor alt, so pådrog me oss alt for mange utvisningar imot av ein dommar so stilte i blått, noko som to gonger gjorde at Fjørajentene kasta feil. Trudde i 2009 at ein domar kunne ta på seg ein vest i gult eller raudt, men det viste seg å vera særs vanskeleg. Me landa faktisk på månen i 1969, og domar i ein anna farge enn eit av laga, skulle vel ikkje vera det vansklegaste å få til. Tvert imot.

Dermed vart sluttresultatet 30-12 til Sogndal. Fjøra sin toppscorar i kampen vart Veronica Røysum med 5 mål.

Tap til tross, jentene hang ikkje med hovudet av den grunn. Me vart gledeleg overraska over kor godt humøret var til tross for tapet. Dette blir særs vktig å ta med seg vidare i sesongen. Dette var berre ein kamp, ei trening, og eg er viss på at når serien startar vil jentene vera kapable til å kjempa om poeng i samtlege kampar. Nei, ditta blir moro.

Tilstades i hallen var om lag 100 engasjerte åskodarar, i tillegg til ein hund i band utanfor. Flott å sjå at handballinteressa i Sogndal er stor.

Me gler oss til å følgja jentene vidare og kan nemna at serien startar sundag 4. oktober med ein rakkarøkkare av ein kamp mot erkerival Syril. Kampen går kl 15:00 i Syril idrettshall. Der kjem me til å vera og det bør du og.

Bilete frå kampen