Foto: Bjørn Egil Moldestad Ole Morten Kvam spelte ein ok kamp mot fylkets beste juniorar, og her han han god kontroll på ein angripar.

Kampen bar preg av tidspuktet på sesongen, og me såg at det er like lenge sidan Fjøra spelte ein seriekamp til dei skal spele den neste. Me skriv 4. januar og slik såg det ut også. Det er nok liten tvil om at dei fleste Fjøraspelarane har ein del å gå på når det gjeld kondisjon. Dette er me ikkje spesielt redde for, det pleier å løysa seg sjølv når treningane no kjem i gong for fullt.

Sjølv om det vart tap i dag så viste Fjøra tidvis bra spel der det var god bevegelse og presist pasningsspel. Fjøra var bra med så lenge kreftene heldt og hovudet var kaldt. Men me såg også mangel på konsentrasjon og mange undøvendige ballbrot i mot. Nokre av måla i dagen kamp må kunne karakteriserast som heller billige.

Bra start av Fjøra
Fjøra kom best i gang i denne kampen og var det klart førande laget spelemessig, men SFFK var farlege når dei braut Fjøra. Mellom anna så varta Patrik Fritzon opp med ei fin redning heilt i starten etter eit gjennomløp med ditto avslutning. Fritzon gjorde forøvrig sine saker godt i denne kampen og han hadde også ei heilt utruleg reaksjonsredning litt seinare i kampen.

Men det var Fjøra som var best i starten og etter kun 7 minuttar var det klart for leiing til dei raude. Stian Solberg fekk eit langt oppspel som han la flott attende til Ronny Einar på 30 meter frå SFFK-buret. Einan kom i fart bakifrå, tok med seg ballen inn i boksen til SFFK og sette ballen kontant bort i hjørna bak ein sjanselaus Lysne i SFFK-målet.

Berre minuttar seinare varta Fjøra opp med ein kjempekontring som nok burde ha ført til eit nytt mål. SFFK hadde fått corner, men den vart klarert langt av Ronny Einan. Klareringa fungerte som ei kjempepasning til Stian Solberg som var på hugget oppe på topp. Han parkerte SFFK-forsvaret og kom åleine med keeper Karl Edvin Lysne. Solberg prøvde å skyta, men skotet vart flott redda av Lysne. Det spørst om Solberg burda ha runda keeper, stor fart som han hadde.

Fjøra fortsett med å vera det førande laget og sjølv om SFFK prøvde seg med god beinflytt og hurtig spel så var Fjøra med på notane og tetta bra igjen. Fjøra greidde å stresse SFFK til å gjera feil også slik at dei kunne setje i gang eigne angrep i frå gunstig posisjon. Slik som i den 19. minutten då Torbjørn Ylvisåker braut og sette opp Arild Underdal. Underdal klinka til frå 25 meter og ballen small i tverrliggjaren og over.

SFFK tok over
Etter 24 minuttar av 1. omgang så var SFFK svært nær utlikning. Dei kom seg ned på kanten og fekk lagt ballen inn i feltet. Ballen gjekk via Ole Morten Kvam og endra retning radikalt. Me såg ballen i mål, men på mirakuløst vis greidde Patrik Fritzon å hindra baklengs. Som ein tiger var han der og slo ballen til corner som det ikkje vart noko ut av.

Heilt på tampen av omgangen mista Fjøra konsentrasjon og det utnytta SFFK og Bernt Norevik. Fjøra vart for ubeslutsomme utanfor eigen boks, Norevik fekk ballen på 20-25 meter, forserte mot mål og ganske upressa sette han ballen flott til side for Patrik Fritzon som lite kunne gjera med den avslutniga. Flott gjort av Norevik, men sjølvsagt altfor lettvindt.

Svak 2. omgang
Den andre omgangen var ikkje spesielt god sett med Fjøraauge. Dei sleit ofsleg med posisjoneringa si, noko som mellom anna må tilskrivast at fleire spelarar spelte i uvante posisjonar.

SFFK gjekk opp i leiinga etter 38 minuttar då dei utnytta ei svak Fjørapasning i eige forsvar. Gisle Myhre vart spelt fri igjennom forsvaret til Fjøra og prøvde å overlista målvakt Fritzon. Fritzon redda forsøk nummer ein, men returen sette landslagsspelar Myhre i mål. Dermed hadde SFFK snudd kampen. Omgangen var SFFK sin fullt og heilt og både Bernt Norevik og nemnte Gisle Myhre fekk tidvis stor plass å boltre seg på. Altfor stor plass.

Fjøra hadde einkelte sjansar i omgangen, men fekk ikkje til spesielt mykje. Det var SFFK som hadde dei største sjansane i tillegg til det målet dei fekk.

Litt betre i siste omgang
Sjølv om Fjøra også tapte siste omgangen så var det litt meir lyspunkt i denne enn i den andre. Laget hang litt betre saman, men dei merka nok at formen ikkje er heilt inntakt mot dei veltrena joniorspelarane.

Fem minutt ut i omgangen utlikna Fjøra på eit flott angrep der ballen gjekk hurtig og på få touch. Roger Birkeland fann Sigurd Fardal Nes med ei pasning. Nes kippa ballen vidare til Kyrre Mats Myren ute på kanten. Myren slo ein flott ball igjennom til Arild Underdal som sette ballen bort i hjørna. Der sat angrepsspelet godt.

Men det virka som at Fjøra hadde brukt opp kruttet for det var SFFK som tok over og skapte sjansar. Etter 68 noterte me eit kanonskot i tverren frå vel 20 meter. Etter 71 minuttar var det på ny klart for leiing til SFFK. Ein ball vart slegen inn i bakrom til Fjøra. Ein SFFK-spelar stakk imellom Sigurd Fardal Nes og Ole Morten Kvam og la ballen inn i feltet til lirdølen Ole Johnny Cirotzki Voll som hadde ein einkel jobb med å setja ballen i mål.

Sju-åtte minuttar seinare var det klart for nytt SFFK-mål, denne gongen ved ein god Bernt Norevik. Men nok ein gong lyt me nok få lov til å spørsja spørsmål om ikkje Fjøra burde ha avverga denne scoringa. Målet kom etter eit langt oppspel med stuss i bakrom og gjennomløping. Ingen Fjøraforsvarar var med på det gjennomløpet. Bjarte Hovland kom ut for å prøva å avvergja, men ballen vart trilla til sides og bakfrå kom Norevik og trilla ballen i tomt mål.

Mot slutten tok Fjøra seg litt saman og hadde ein stor sjanse til å pynta på resultatet, men Johan Salveson lukkast ikkje med avslutninga og skaut utanfor. Kampen ebba ut med fortent SFFK-siger.

Sluttord
Me får ta dette for det som det var, ein treningskamp og starten på ei ny oppkøyring. Det er godt å vera i gang att! Fjøraspelarane fekk seg ei skikkeleg treningsøk i dag mot juniorspelarar som virka svært godt trena. Dei fleste av spelarane har hatt fullt program i haust då dei har delteke i vinterserien for juniorar. Det har forsovidt også ein par-tre av Fjøra sine spelarar.

Me tykte at Roger Hjellhaug, Patrik Fritzon og Ole Morten var positive i dag, men har likevel lyst å trekke fram Ronny Einan som Fjøra sin bestemann i dagens kamp.

Domar Jonny Skjerven hadde ein einkel dag på jobben og gjorde sine saker etter boka til tross for at han ikkje hadde med seg assistentar på sidelinene.

[Live: Fjøra FK - SFFK jr.]
[Bilete frå kampen]
Referat frå TMFK si heimeside
Referat frå Førde si heimeside

KAMPFAKTA

Fjøra FK - SFFK junior   2-4 (1-2), (1-1)
Sognhallen, 4. januar 2009, kl 14:00

Mål:
1-0, Ronny Einan, 7 min
1-1, Bernt Norevik, 29 min
1-2, Gisle Myhre, 37 min
2-2, Arild Underdal, 65 min
2-3, Ole Johnny Cirotzki Voll, 71 min
2-4, Bernt Norevik, 78 min

Gult kort:
Ingen

Domar:
Jonny Skjerven, Kaupanger IL

Tilskodarar:
Omlag 50 stk

Fjøra (4-4-2): Patrik Fritzon (Bjarte Hovland i 30 min) - Eilert Brox Holme (Johan E. Salveson i 66 min), Ole Morten Kvam, Roger Birkeland, Roger Hjellhaug - Kyrre Mats Myren, Torbjørn Ylvisåker (Eilert Brox Holme i 30 min), Jens-Ivar Nilsen (Stian Solberg i 40 min), Ronny Einan - Arild Underdal og Stian Solberg (Sigurd Fardal Nes i 56 min)

SFFK jr. (4-5-1): Karl Edvin Lysne - Thomas Ness, Gustav Valsvik, Thomas Starheim, Ivar Løvik - Gøran Wigum, Gisle Myhre, Bent Norevik, Eirik Hovland, Sveinung Frantzen - Eivind Grodås

Reservar: Stian Karlsen, Ole Johnny Cirotzki Voll, Lasse Orheim Pedersen og sikkert fleire som eg ikkje har fått med meg.