OPPSUMMERING FREDAG
Fredag 25. november 2005

Då er dei innleiande kampane i gruppe A, B og C ferdigspelte og det vart ikkje dei heilt store overraskingane.

Frå gruppe A gjekk Team Skjørtejeger FC og Lægreidspuben vidare som dei to beste laga. Frå gruppe B Jostedal FC vidare med full pott, 4 sigrar, 12 poeng og ingen innsleppte mål (7-0). Med seg fekk dei Pilte Mix som tidvis imponerte. Frå gruppe C var det inga bombe at Haugen Power vann gruppa med fullt hus. Men me tykte dei sleit litt og laget bør heilt klart ha meir å gå på. S-Laget imponert og slet følgje som 2-ar lag frå gruppe C.

Med dramatikk var det i høve til kven av dei 2 3-ar laga som skulle gå vidare. Klamhøggera var først ferdige og stod med 6 poeng og 7-5 i målskilnad. Dernest kom 2 og 5 FC seg opp på 6 poeng med 6-4 i målskilnad etter å ha slege Skogen FK med 2-0 i sin siste kamp. Dermed var dei unge sogndølene heilt avhengige av at Innaføringane ikkje vann meir enn 2-0 mot Sogne-Prent i sin siste kamp. Lustringane vann heile 5-1 og vart dermed beste 3-ar lag frå fredagen. Kampen enda også med 2 raude kort etter handgemengd mellom Tor Hauge og Kenneth Mo. Dermed måtte 2 og 5 FC sjå at toget gjekk medan dei stod att på perrongen.

Toppscorarar fredagskvelden vart Tommy Hildeskår, S-Laget, med 5 pinnar. Bak han har me Per Ole Tenden, Haugen og Vegard Ruud med kvar sine 4 pinnar. 7 spelarar står bokførde med 3 mål kvar. Desse er Tor Hauge og Stian Kvalsøren - Innaføringadn, Arild Een - Klamphoggaradn, Ole Morten Kvam - S-Laget, Rein Arne Isane - Pilte Mix og Morten Sørensen og Frode Danielsen - Lægreidspuben. Samtlege har sjansen til å pynta på den statistikken i morgon.

Arrangementmessig fungerte opplegget godt, sjølv om me var litt forseinka i starten. Men med Wolffs kadaverdisiplin og kortare pausar mellom kampane greidde me å ta igjen det tapte. Alltid greitt å ha fredagskvelden som gjennomkøyring, då det er laurdagen som er kritisk i høve til å halda tidsskjemaet.

Elles vart det meldt om mykje folk i hallen og ifølgje Tom W. Navarsete var det enormt med folk ein periode. Rekord i KL-samanheng.

Er du interessert i resultata frå kveldens kampar gå inn på menyvalet Resultat og klikk deg vidare på kvart resultat for å sjå kampfakta (målscorarar og kort).